O Consorcio das Mariñas xa ten en funcionamento a súa sede electrónica, a través da plataforma da Deputación da Coruña. Con esta ferramenta en actividade, os veciños dos municipios que forman parte desta comunidade poden realizar trámites administrativos desde a casa as 24 horas do día e os 365 días do ano.
Para utilizalo, os usuarios só precisarán o DNI electrónico ou un certificado electrónico, de xeito que se manteñen todas as garantías legais, así como as de confidencialidade e de seguridade.
Esta plataforma, que fai da Administración un ente máis áxil, máis ordeado e máis transparente, está incluída dentro do Plan de Administración Electrónica Municipal posto en marcha pola Deputación da Coruña co obxectivo de cubrir un dereito do cidadán que é o acceso ás administracións públicas, pero que resulta moi custoso para os concellos.
O investimento da institución provincial para pór en marcha toda a plataforma é de 177.000 euros, o mesmo que tería que realizar cada administración local por separado. En cambio, contar cunha sede electrónica propia para traballar a través desta plataforma non suporá ningún custe para os municipios.
