A campaña especial de promoción e información sobre a doazón de medula ósea “Un match por una vida” chegou a Galicia. Un stand informativo, atendido por persoal da Axencia de Doazón de Órganos e Sangue (ADOS), estuvo instalado no Hospital Álvaro Cunqueiro de Vigo para dar información sobre este xeito de doazón altruísta.
A iniciativa, que foi presentada o pasado mes de setembro en Madrid co gallo do Día Mundial do Doador de Medula Ósea, está impulsada pola Organización Nacional de Transplantes, as Comunidade Autónomas e a Fundación Josep Carreras e ten como obxectivo recoñecer aos doantes de medula ósea, mellorar a información e fomentar este tipo de doazón, fundamentalmente, entre os máis novos e novas.
Fomentar a participación
“Un match por una vida” enmárcase dentro do Plan Nacional de Médula Ósea, e está deseñado para atraer a atención dos potenciais doantes, persoas de entre 18 e 40 anos e acadar a cifra de 500.000 doantes no ano 2022. Na actualidade en España existen máis de 400.000 doadores de medula no Rexistro Español de Doadores de Médula Ósea (REDMO), sendo ADOS o centro de referencia en Galicia para a tipaxe deste tipo de doazón. Na actualidade existen ao redor de 12.000 doadores e doadoras galegos rexistrados no REDMO.
Esta campaña subliña que a probabilidade de atopar un doador de medula non familiar compatible en todo o mundo é de 1 entre 4.000 persoas, polo que o obxectivo destas campañas, pasa por aumentar o número de persoas que pasen a formar parte do REDMO.
Contacto e información
ADOS lembra que para informarse sobre a doazón de médula ósea ten a disposición dos cidadáns o seu teléfono gratuíto 900 100 828, as redes sociais da Axencia (Facebook, Twitter e Instagram), a súa web ados.sergas.gal así como a páxina de autoinclusión como doantes de medula ósea galicia.medulaosea.org
Discussion about this post