O Bng de Arteixo presenta hoxe unha candidatura para lograr “o concello co que soñamos”

“O que une a todas as persoas que formamos parte desta candidatura é a idea de un proxecto político para Arteixo que poña no centro á xente" di Xurxo Couto

Xurxo Couto presenta a candidatura eleccións municipais 2023 — O Bng Arteixo presenta hoxe a candidatura as eleccións municipais 2023

Redacción El Diario de Arteixo

28/abr/23 - 10:07 Actualizado: 28/abr/23 - 10:21

O evento público no Balneario de Arteixo servirá para dar a coñecer a súa lista para os comicios do 28 de maio e para presentar a candidatura do Bng da comarca coruñesa coa participación do alcalde de Carballo, Evencio Ferrero

O Bng de Arteixo conta cunha candidatura chea de “ilusión, experiencia e ganas de chegar ao goberno para lograr o concello co que soñamos”, afirma Xurxo Couto, candidato da formación nacionalista. A lista, que foi aprobada por unanimidade na asemblea local, conta con veciñas e veciños do municipio que proceden dun variado abanico profesional.

“O que nos une a todas as persoas que formamos parte desta candidatura é a idea de que queremos un proxecto político para Arteixo que poña no centro á xente, que é o máis importante da política local”, asegura Couto. “Un concello máis democrático, participativo e transparente, con servizos públicos de calidade”.

“Un concello cun urbanismo inclusivo, democrático, equilibrado e seguro, onde os espazos públicos sexan de calidade, accesíbeis, onde haxa verdadeiros centros de sociabilización e de convivencia para todas e todos”.

O Bng presentará as persoas integrantes da lista nun acto público que terá lugar hoxe venres, 28 de abril, ás 20.00 horas no Balneario. No evento estará presente o alcalde de Carballo, Evencio Ferrero, así como os candidatos do Bng na comarca coruñesa.