Os fisioterapeutas inciden no videoconsello de setembro no marco da súa campaña "12 meses, 12 consellos de saúde" no uso dos dispositivos de suxeición que utilizamos como asento de nenos e bebés cando viaxamos en coche.
Nos dispositivos de suxeición é fundamental prestar atención ao repousacabezas, colocándo a nena/neno á altura adecuada, así como utilizar accesorios que permitan evitar malas posicións da cabeza dos nenos cando queden durmidos durante os traxectos.
O videoconsello de setembro se centra nas precaucións para ter en conta á hora de transportar bebés e nenos no coche de maneira saudable.
Consideracións como ancorar correctamente as cadeiriñas dos nenos ao asento do coche ou utilizar sempre dispositivos de suxeición que estean homologados, son tamén aspectos fundamentais para que os nenos e bebés viaxen o máis suxeitos e seguros posible no caso de que se produza calquera accidente.
Os fisioterapeutas recomendan que, en función do peso e a idade do menor, viaxen a contramarcha (é dicir, mirando cara atrás e non cara a adiante) e que os cintos de seguridade estean axustados á talla e tamaño do neno, evitando que quede pouco suxeito ou que, pola contra, o cinto exerza demasiada presión sobre o neno e poida sentirse incómodo.
Ademais, os fisioterapeutas aconsellan prestar atención ao tipo de dispositivo no que se transporta ao bebé, xa que moitos non están deseñados para permanecer neles demasiado tempo e poden ser prexudiciais para a columna do pequeno. En concreto, os dispositivos tipo “ovo” non son aconsellables para traxectos de longa duración.
Outras recomendacións dos fisioterapeutas neste videoconsello son evitar colocar aos bebés nos dispositivos de suxeición con roupa moi voluminosa, como chaquetóns ou bufandas, xa que en caso de impacto é máis probable que poidan escorregarse con maior facilidade; ou utilizar espellos interiores que permitan controlar aos menores sen variar a postura do condutor: unha vez estean situados correctamente no seu dispositivo de suxeición, que colocaremos preferiblemente na parte de atrás do coche, os espellos interiores facilitarán que os condutores podamos manter unha posición adecuada de condución sen perder o control visual dos menores, evitando así posibles riscos derivados dun xiro cara atrás.
Recomendacións á hora de cargar aos bebés
Á hora de cargar aos bebés en brazos para montarlles no coche tamén se deben ter en conta algunhas consideracións, como evitar movementos bruscos e abrir a porta do vehículo o máximo posible para non realizar xestos forzados innecesarios.
Mentres se carga ao bebé en brazos é recomendable ter en conta algunhas recomendacións que poden previr a aparición de lesións musculoesqueléticas. Así, os fisioterapeutas aconsellan flexionar os xeonllos e manter ao bebé o máis pegado ao corpo posible se hai que levantalo desde unha baixa altura. En caso de utilizar sistemas de soporte de bebés que conseguen mantelo o máis próximo ao noso corpo posible, sempre hai que ter en conta a estabilidade do adulto.
Por último, aconsellan tamén non manter moito tempo a un menor en brazos sen ningún tipo de soporte, pois pode producir lesións nas costas derivadas do esforzo prolongado ou as malas posturas.
O Colexio Oficial de Fisioterapeutas de Galicia participa na campaña "12 meses, 12 consellos de saúde" que leva a cabo a nivel nacional, e na que tamén están implicados os colexios profesionais de fisioterapeutas de Andalucía, Cantabria, Cataluña, Comunidad de Madrid, Comunidade Valenciana, Navarra e País Vasco.
